بصراحه …. من عمري ١٦ وانا وزني يزيد بشكل كبير بس من بعد الزواج نقدر نقول انه طمر شوي … فمؤخرا فكرت بين اني اسوي تحزيم او اني اسوي دايت
بس التحزيم مخرعني شوي عرفت ناس التحزيم مشى وياهم بشكل جميل وعرفت ناس التحزيم اثر عليهم مما حدى بهم الى الدخول للمستشفى للعلاج والبعض يستعد للسفر للخارج للتصحيح بسبب جهل بعض الاطباء خاصة اللي بالمستشفيات الحكوميه
المهم خلونا من التحزيم الحين…. موضوعي عن الدايت او الرجيم
اذا قلت اني راح امتنع عن الطعام الدسم والمطاعم الخارجيه فاطلع كاذب مع سبق الاصرار … الاكل من ايد ام حيدر ما ينعاف واول ما اشوفه اقضي على (القنچه) وما ارحمها اما المطاعم ولو انه بالاسبوع مره بس يعني اكل همبرقر او ستيك بدون بيبسي فهذا من سابع المستحيلات
فلقيت حل عشان اتلافى هذه التعقيدات وهي التالي
طبعا اللي صار اني رحت حق دايت كير بمجمع البيرق عشان اسألهم عن الطريقه وشلون الدايت وكم ممكن انزل
بصراحه شي حلو ولو السعر نار بس هم اعقل من العمليه بحيث اني انا اتحكم بوزني وشكثر ابي انزل واوقف عند الحد المطلوب عكس العمليه اللي اضل انزل وانزل حتى لما اوصل الشكل اللي ابيه هم اضل انزل … يعني اصير اخرع
اللي يصير شنو انه اول شي اقابل اخاصئي تغذيه وهذا الاخصائي يفحص نسبة الدهون وبعدين يعطيني نصائح وتعليمات اتبعها خلال الدايت وبعدين انا احدد شنو الدايت اللي ابي ابدي فيه
في انواع ٥ انواع بالنسبه لشركة دايت كير وجميع الاشتراكات لمدة ٢٨ يوما (مادري ليش مو ٣٠) وشامله عطلات نهاية الاسبوع
١- نظام لايف ستايل وهو متكامل ويكون ٣ وجبات يوميا مع وجبتين سناكس ووصلون مره وحده باليوم مجانا او تختار التوصيل مرتين مقابل مبلغ معين – سعر هذا الاشتراك ٢٢٥ دينار مع التوصيل مره واحده او ٢٥٠ دينار مع التوصيل مرتين
٢-نظام اكشن الغذائي وهو لمن لديهم اراده قويه (كما هو مكتوب) ويكون ٣ وجبات باليوم بدون سناكس ووصلون باليوم مره وحده مجانا او مرتين مقابل مبلغ معين وسعر الاشتراك – ١٩٩ دينار للتوصيل مره واحده او ٢٢٤ للتوصيل مرتين
٣-نظام بروجرس وهو لمن يحتاجين الى دفعه بسيطه لتحقيق الوزن المثالي ويكون ٣ وجبات رئيسيه ووجبتين سناكس ولكن فقط في ايام الاسبوع دون الويك اند وسعر الاشتراك – ١٧٥ دينار مع توصيل مره واحده يوميا
٤-نظام مينتينانس وهو يساعدك في الحفاظ على الوزن الحالي لمن وصلوا للوزن المثالي ويكون ٣ وجابات رئيسيه مع وجبة سناكس واحده وسعر الاشتراك – ١٥٥ دينار توصيل مره واحده باليوم شامل عطلة نهاية الاسبوع
٥-نظام لايت الغذائي وهو وجبه صحيه واحده يوميا لتكون حرا لباقي اليوم وسعر الاشتراك – ١٠٥ دينار مع توصيل مره واحده يوميا شامل عطلة نهاية الاسبوع
المشكله بدايت كير شي واحد …. حسسوني اني داخل مستشفى مبارك .. اقرب موعد اهو اول ١٠ ايام من شهر ٦ … شدعواااااااه ترا والله بدفع مو ببلاش ما يصير شي لو الاخصائي يزيد ٥ حالات يوميا بدال حالتين بس مو عمليه بس باخذ نصائح وبمشي
المهم هذا الملف اللي عطوني اياه وداخله كود اوراق اوقعهم ودفترين يوروني الوجبات والمنيو ووايد شغلات يشوق بس مو نوعي اللي انطر وايد فبشوف الشركات الثانيه لمواعيد اقرب
اتمنى الموضوع عجب اللي بخاطرهم يخوضون تجربة الدايت ولكن بشكل سليم اكثر من التفنن الشخصي والحرمان المتواصل من غير معنى اللي بالنهايه راح يهلك جسمك … راح تضعف بس جسمك راح يصير هزيل ولا يتحمل اي شيء لانه الطريقه خاطئه فانصح بمراجعة المختصين ولو للاستشاره
Yours Truly
3zeezan
